"Yo Thaaro Parivaar hai hardam aati jati rahije Maa"

Shri Gnaeshay namh:

Jai Rupa Dadiji !             Jai Bhojlai dham ki !                Jai ho Mahashakti Rupa Dadiji ki !

 

Aadarniye Mitron,

Mujhe bahut prasanta hai ki Adarniye Surendra ji Bohra ne whatsapp per Naglanya Bohra samaj ka ek group banaya hai aur kai group members ne Param pujniya aadarniya Dadiji maharaj ke bare mein jankari hasil karne ki utsukta dikhai. Bahut hi khushi ki baat hai ki samaj ka yuva varg apne purvajon ke garimamay itihaas ko janne aur samjhne ka interest rakhta hai. Waise toh Dadiji ki garima ka varnan karna Surya bhagwan ko Deepak dikhane ke saman hai fir bhi mujhe jo jankari apne samaj aur parivar ke bade bujurgo se mili hai usko aap sabhi Naglanya Bohra samaj ke bhai bahino ke saath share karna apna farz samjhta hu.

Jaise Pandia Samaj mein Aadriye Shyam Pandia ji huye jinki mahima aaj har Pandia samaj ka bacha bacha janta h aur apne aapko gourvanvit mahsoosh karta hai ki unka janm bhi ussi samaj mein hua jisme Shyam Pandia jaise mahan sant huye waise hi Naglanya Bohra samaj mein Mahashakti Veerangana Rupa Dadiji ki huyi thi jinki mahima aur shorya gatha anuthi hi nahi apne aap mein tyag aur veerta ki ek misaal hai.

Aaadarniye Mitron,

Jaisa ki aap sabko vidit hoga ki Naglayna Bohra samaj ka udgam sthaan Marudhar ki dharti par Churu district ki Sujangarh tehsil ka Bhojlai gaon hai. Un dino Sujangarh Harbuji-ka-kot kehlata tha aur Bhojlai gaon Sujangarh se lagbhag 3 kos yani 9 km ki duri par basa hua hai janha par Naglanya Bohra samaj ke bahut parivar base huye the aur paristhiyon ke vash dheere dheere sab Bhojlai se nikal kar dusri jagaho par jakar bas gaye aur janha tak meine apne bujurgo se suna hai Pulasar ke Naglanya Bohra samaj ki jaden bhi Bhojlai gaon se judi huyi hai. Kyonki Sujangarh hi Bhojlai ke sabse najdeek tha issliye adhiktar Naglanya Bohra Parivar migrate hokar Sujangarh aakar bas gaye aur uss baas ka naam bhi Bhojlai baas pad gaya. Abhi bhi khet bhojlai ki kankad mein hi hai par ghar bhojlai baas Sujangarh mein hai. Bhojlai gaon mein janha Mahashakti Rupa Dadiji ka paavan Mandir hai wanha ab ek hi ghar bacha hai Naglanya Bhohra parivar ka jinhe hum sab dhani wale kahte hai.

Aadarniye Mitron,

Meri ek Bhuwa Dadiji thi Param Pujaniya Tulsi dadiji jo ki samaj ki bahut hi samannit mahila thi aur samaj ke bujurg unko bhai ka darja dete the chhoti umar mein baal vidhwa hone ke baad unhone hamare pure parivar ko sambhala kyonki mere Dadaji ka dehant kum umar mein hi ho gaya tha. Rupa Dadiji ke bare mein mujhe meri bhuwa dadiji aur meri mataji ne jo kuch bataya tha wo mein aap sab ke saath share kar raha hu lekin yeh sab moukhik jankari aur bujurgo dwara batayi baat ke jariye bayan kar raha hu issliye koi bhool ya galati huyi toh Mamtamayi Dadiji aur pure samaj se agrim maafi chahta hu.

Mere Naglanya samaj ke sabhi Aadarniye bhakton se nivedan hai ki Dadiji ke tyag aur shorya ki baat samaj ke bache bache ko sunaye aur na sirf yeh pidhi balki apni aane wali saari pidhiya bhi Dadiji ke bare mein jane aur ukna aadar, samman kare.

Aadarniye Rupa Dadiji Bhojlai ke Naglanya Bohra parivar mein byah kar aayi thi. Dadiji vilakshan pratibha ki dhani thi aur na kewal sundarta mein balki gunvata aur budhimani mein bhi unke saman koi nahi tha. Na kewal apne parivar mein balki pure Naglanya Bohra samaj aur Bhojlai gaon mein sab unki izzat karte the aur apni samsyaon ko suljhane hetu Rupa Dadiji ki salah lete the. Unn dino Bhojlai gaon aabad tha aur bahu khush haal bhi tha gaon mein Rajput aur Naglanya Bohra parivar hi jyada the. Kheti badi achi thi sabke paas jamin thi aur gaon ke log khush the. Lekin prakriti ke aage kiska vash chala hai bhaynkar akkal pada aur gaon ke log vishthapit hone lage kheti badi ke abhav mein roji roti kamane ke liye samaj ke mard kaam dhandha dhundne bahar jane lage aur kuch parivar vishthapit bhi hone lage. Akaal ke sath sath Mahamaari bhi feli aur na kewal Bhojlai mein balki lagbhag saare Bikaner region mein ha ha kaar mach gaya. Aise mein Dadiji ne gaon ke logo ko saahas diya aur kaha ki gaon chhodkar jana budhimani ka kaam nahi hai bura waqt aaya hai toh chala bhi jayega sab dheeraj se kaam lo. Mard log roji roti kamane bahar jayenge lekin mahilayen aur bache gaon mein hi rahenge ek baar akal pada hai agle saal bhagwan achi barsat karenge aur gaon ki khush haali lout aayegi.

Iss tarah se bure waqt mein Dadiji ne sab gaon walo ko samjha bhujhakar jo gaon chhodkar jane ko aamada the unhe roka aur housla badhaya. Gaon ke Aadmi log mehnat majduri karne bahar jane lage kuch nazdik lekin kuch dur gaye.

Honi ko kuch aur hi manjoor tha shayad, ek taraf pura gaon akaal aur mahamari ki chapet mein aane se behaal tha, 2 waqt ki roti ka jugaad karne gaon walon ko bahar jana pad raha tha aur dusri aur Raja (Jameendaar) ka farmaan aaya ki gaon walo ko kar (tax) dena padega. Unn dino Firangiyon ka raaj tha desh mein aur Firangi desh ki bholi bhali janta ko loot rahe the. Raja Maharaja aur jameendar Firangiyon ke haath ki kathputli bane huye the. Firangiyon ne kar mukt karne se mana kar diya aur Jameendar / Raja garib janta ki mushkilon ki parvah karne ki bajay jabardasti kar vasooli mein lag gaye. Firangiyon ne Raja – Maharajao ko bekar aur ayaash bana diya unki aatma mar chuki thi sab lutere bane huye the janta ke dukh dard se unka koi lena dena nahi tha, aade waqt mein janta ki sahayata karne ki bajay unhone pahle se hi aarthik roop se badhaal, akaal aur mahamaari ki maar jhel rahi janata par kar ka bojha ladna chaha.

Yeh Maharaja Ganga Singh ji se bahut pahle ki baat hai uss samay Raja Mansingh ji hua karte the, Firangiyon ke dabav mein aakar Raja ne Jameendaro ki badoulat gaon gaon se kar ki vasooli karni shuru kardi. Jab yeh khabar Bhojlai gaon mein panhuchi toh gaon wale bahut dukhi ho gaye ki iss bure waqt mein Raja apna saath dene ki bajay Firongiyon ka gulaam ban kar rah gaya hai. Gaon walon ne hamesha ki tarah Rupa Dadiji ki salah mangi aur Dadiji ne kaha chahe kuch bhi ho jaye Bhojlai gaon k ek bhi ghar se tax nahi diya jayega kyonki aaj hamari sthithi kar dene jaisi nahi hai agar Raja hamari koi madad nahi kar sakta toh pahle se hi pareshan gaon walon ko aur takleef dene ka bhi usko koi adhikaar nahi hai. Pure gaon ne Rupa Dadiji ki baat mani aur yeh tay hua ki Bhojlai gaon iss baar kar nahi dega.

Raja Mansingh ke paas khabar panhuchi toh bahut naraz huye. Raja ne Thakur sahib ko kaha ki gaon se kar nahi aaya toh jameendari chheen lenge. Thakur sab ne apni taraf se Dadiji ko manane ki puri koshish ki par Dadiji ne kaha Thakur sab Bhojlai gaon mein sirf Naglanya Bohra samaj hi nahi h yanha Rajput bhi hai aur baki gaon wale bhi hai sawal mera ya mere parivar ka nahi h sawal gaon ka hai aur hum kar nahi se skate kyonki adhikansh gaon walo ke paas do waqt ki roti jutana bhi mushkil ho raha hai toh kar kanha se laye. Jameendar ji nirash hokar lout gaye. Raja Man singh bahut krodhit huye aur apne sipahiyon ko Bhojlai bheja aur khud bhi nikal pade.

Akaal aur Mahamaari ka kahar jhel rahe Bhojlai gaon ke adhikansh purush din mein mehnat majdoori karne bahar chale jate the. Jab Raja apne sipahiyo sahit gaon mein aaya toh jyadatar mahilayen aur bache hi gaon mein moujood the. Raja ke sipahi atyachar karne lage par gaon walo ne tax dene se saaf mana kar diya. Rupa Dadiji ne Raja ke sipahiyo ko aade hatho liya ki mard hokar tum log mahilao aur bacho par hathiyaar chalate ho arree duston yeh sab toh bechare waise hi parkarti ki maar se dukhi hai tum log kar kiss adhikaar se mangne aaye ho sharm nahi aati tumhe aur tumhare Raja ko.

Raja ka naam lete hi sipahi Rupa Dadiji par toot pade par wo toh Mahashakti Veerangana thi, Naglanya Bohra Parivar ki kulvadhu, Bhojlai gaon ki shobha aaj saakshaat Maa Chandi ka roop dharan kar chuki thi. Haath mein talwaar liye Mahakali ki tarah Rupa Dadiji dusht sipahiyon se yudh karne lagi. Mahashakti Rupa dadiji ne akele hi Raja ki sena ke chhakke chhuda diye. Maa Maha Durga ki tarah Dadiji sipahiyon ko parast karne lagi.

Sipahi Raja ke paas doud kar gaye aur kaha ki RUPA DADIJI SADHARAN AURAT NAHI HAI WO SAAKSHAT DEVI HAI. Unse yudh mein jeet pana sambhav nahi hai. Raja Mansingh ko krodh aaya aur jyada sipahiyon ko lekar chala Rupa Dadiji se yudh karne. Raja Mansingh jab Rupa Dadiji ke samne panhucha toh unka tez aur aabha dekhkar bhochanka rah gaya. Usne Rupa Dadiji ko kaha aap kar do aur gaon walon se bhi hame kar dilwao kyonki hume Firangiyon ka aadesh hai aur agar aaj ek gaon kar nahi dega toh kal ko dusre gaon wale bhi bagawat kar sakte hai jo hume manjur nahi hai.

Rupa Dadiji ne kaha Rajaji mera gaon hamesh kar deta aaya hai lekin aaj mere gaon walo ki halat kar dene ki nahi hai yeh aapko batane ki jarurat bhi nahi hai kyonki aapko puri riyasat ki jankari hai. Bhojali gaon ka ek ghar bhi kar nahi dega, rahi baat bagawat ki toh Raja ji kisi na kisi ko toh pahal karni hi padegi kab tak dusht Firangiyon ka aur atayachari jameendaro aur ayyas Rajao ka atyachaar sahte rahengi kabhi na kabhi kisi na kisi ko toh aawaaz buland karni hogi? Hamara shobhagya hai ki aaj yeh aawaz marudhar ki dhara ke iss chhote se Bhojlai gaon se uthi hai jiski goonj videsh mein bethe Firangiyon ko bhi sunayi degi.

Rupa Dadiji ne Raja Man Singh ko janata ki bhalai ke bare mein sochne ka kaha par Raja Firongiyon ke darr se lachar tha. Raja ne kaha kar nahi dogi? Dadiji ne kaha nahi. Raja ne Sipahiyon ko kaha gaon mein maar kaat macha do, loot lo, Rupa Dadiji ne dekha ab Raja bechari mahilao aur bacho par atyachar karega. Dadiji ne vichar kiya ab akele Raja aur uski sena se paar pana kathin hai aur gaon mein mard sab bahar gaye hai.

Rupa Dadiji ne talwar uthai aur hunkaaar bharti huyi boli – Jai Bajaran Bali !  Jai Maa Durge ! Rajaji mein aur mera gaon kar nahi dega aap gaon ki auraton aur bacho par atyachar band karo……………….

“AUR YEH LO NAGLANYA BOHRA PARIVAR KI KULVADHU RUPA KA SHEESH DAAN KARTI HU MEIN RAJA’’

Mahashakti Veerangana Rupa Dadiji ne yeh kahte huye apna sheesh kaat kar Raja ko bhent kar diya.

Boliye Mahashakti Rupa Dadiji ki jai ! Boliye Naglanya Bohra samaj ki kul vadhu Rupa Dadiji ki jai !

Jaise hi Dadiji ne apna sheesh kata devta push varsha karne lage. Mahashakti ko swarg le jane ke liye vimaan aaya par Dadiji ne kaha mein Bhojlai gaon mein byah kar aayi hu aur mein yenhi rahungi mujhe swarg ke sukh ki kamna nahi hai.

Raja Mansingh bahut pachtaya gaon walo se maafi mangi puri riyasat ka kar bhi maaf karwaya par gaon ki janata ne Raja ko maaf nahi kiya.

Dadiji ki murti ki sthapna huyi pura gaon Dadiji ki puja karta aur Dadiji aaj bhi sab ke sukh dukh mein shamil hoti hai. Lekin Dadiji ka prasad aaj bhi Rajputon ko nahi diya jata hai.

Dadiji din raat gaon ki raksha karti hai. Jab Bhojlai mein daku aaye aur raton raat gaon ko lootne ki yojna banayi to Dadiji chilla padi arree tabron Daku aagya re , utho re daku aagya re…. Dakuon ke sardar ko kafi der tak samajh mein nahi aaya ki aakhir bol koun raha hai. Uss waqt mandir nahi tha khejdi ke neeche Dadiji ki murti thi jab Daku ne dekha ki aawaz muti mein se aa rahi toh bhochanka rah gaya lekin gaon walo ke jagne ke dar se Dadiji ki murti par waar karne laga par Dadiji chup nahi huyi gaon wale jag gaye aur Dakuon ko bhagna pada. Aaj bhi dekh sakte ho aap Dadiji ki murti khandit hai.

Aise anek chamtakar hai jo Dadiji ne Naglanya Bohra samaj aur gaon walo ki bhalai ke liye kiye.

Mamta aur tyag ki murti Dadiji ne apna pura jeevan samaj aur gaon ki bhalai mein lagaya aur swarg ka sukh thukra kar aaj bhi samaj aur gaon ki bhalai ke liye hi Bhojlai mein Veerajmaan hai.

Ek chamtkar jo har bar, har saal hota aaya hai aur Bhojlai gaon aur Bhojlai bas ka bacha bacha iss baat ko janta hai ki jaise hi Dadiji ke mandir mein jagran lagta hai aur bade bujurg bhojlai jkar jhopadi bandhne ki rasm puri karte hai har halat mein barsat hoti hi hoti hai.

Aashadh Sudi 13 Dadiji maharaj ki badi 13 hai uss din pura Naglanya bohra samaj Dadiji ke mandir Bhojlai jate hai, raat ko jagran hota hai subah Churme ke parsad ka bhog lagta hai.

Naglanya Bohra samaj ke jitne bhi parivar Sujangarh mein base huye hai bacho ki shadi ki pahli jaat Dadiji ke lagti hai, tabariyon ki jaat Dadiji ke lagti hai.

Lekin sirf itna hi kafi nahi hai Mitron jo Dadiji ne Naglanya Bohra Samaj aur gaon ke liye kiya hai uske liye saal mein 1-2 baar jagran aur prasad ya byav shadi aur tabron ki dhok, jaat de dena aur 13 ke din churma ka prasad Chadha dena hi Dadiji ko sachi shradhanjali nahi hai.

Dadiji ka balidaan mamuli nahi tha unhone samaj aur gaon ki bhalai ke liye mahan balidan diya tha jiski koi tulna nahi ki ja sakti. Dadiji sachi desh bhakt thi unhone matri bhumi ki raksha karne hetu apna sheesh kat kar de diya.

Hum aaj bhi gaate hai khub ladi mardaani wo toh jhanshi wo toh jhanshi wali Rani thi par kya hamari Rupa Dadiji kisi bhi Kshtrani se kum thi jinhone akele atyachariyon se aur baad mein murti roop mein hokar bhi Dakuon se loha liya tha.

Kya hum Aisi Mahashakti Rupa Dadiji ke balidaan ko yunhi bhula denge?

Aaj hum anek aajadi ke veeron aur swatntrata senaniyon ko yaad karte hai aur unhe shradhanjali dete hai. Kya Param Veerangana Mahashakti Rupa Dadiji kisi bhi roop mein kisi bhi senani se kum thi?

Mitron, Hum Dadiji ke tyag aur balidaan ko aise vishmrit nahi kar sakte hume Dadiji ki Veerta, tyag, smaj seva aur balidaan ko yaad rakhna hai aur aane wali generation ko iske bare mein batana hai taki samaj ki aisi mahan vibhuti ko yunhi bhula na diya jaye.

Doston, Mein khud Dadiji ke mandir mein nahi ja pata hu kyonki saal 2 saal mein ek baar hi gaon jana ho pata hai par mujhe Dadiji ka smaran har pal rahta hai.

Hamare ghar mein ghar se bahar jate waqt Jai Shri Krishna ya Narayan Narayan ke saath Jai Dadiji ki kahne ka niyam hai.

Dadiji hamare har sukh dukh mein saath rahti hai. Na jane kitni hi samsyaen Dadiji ne chutkiyon mein suljha di. Kuch bhi takleef aati hai Dadiji ki sharan mein jate hai aur kripa mayi Dadiji hamesha sab theek kar deti hai.

Mein kya varnan karu Dadiji ki mahima ka ? Meri aukaat hi kya hai ki mein Dadiji ki mahima ka bakhan kar saku. Jitana kaha jaye utna kum hai.

Mitron, Pura Naglanya Bohra Samaj ek hi hai, hum log migrate ho gaye koi kanhi toh koi kanhi sab apni roji roti aur kaam dhande ki vajah se alag alag jagaho par jakar bas gaye par Dadiji aaj bhi wanhi hai, chahe kanhi bhi raho, Dadiji aaj bhi hum sab ke saath hai, hum unhe bhale hi yaad na Karen unhe pura Naglanya Bohra samaj yaad hai aur rahega aur jab bhi bulaoge doudi chali aayegi hamari mamtamayi pyari Dadiji.

Ek-ek karke saare Naglanya Bohra parivar Bhojlai chhodkar bahar nikal gaye par Dadiji ne swarg ki sukh suvidhaon ko thukra kar yeh sankalp liya tha ki mein apne parivar aur gaon ko chhodkar kanhi nahi jaungi aur Dadiji aaj bhi apne sankalp par adig hai. Rupa Dadiji aaj bhi Bhojlai gaon mein veerjmaan hai.

Mahashakti Rupa Dadiji aaj bhi gaon walon ki har sankat ki ghadi mein raksha karti hai.

Aisi Tyag ki murti Mahashkti Rupa Dadiji ko mein pure Naglanya Bohra Samaj, Sabhi Pareek bandhuon aur Bhojlai gaon ke bhakton ki taraf se sastang dandwat pranam karta hu aur Sheesh ki dani, Maha balidani dadiji se samaj aur manvta ke kalyan ki prathna karta hu.

Meri sabhi Naglanya Bohra Samaj ke bhai bandhuon se nivedan hai ki wo Bhojlai jakar Dadiji ke mandir mein jarur dhok lagave. Dadiji sabka bhala karegi.

Ek baat mein spast karna chahunga ki apni Rupa Dadiji Mahashakti Veerangna thi unhone apne sheesh ka samaj aur gaon ke hit mein balidan diya tha. Dadiji iss sansaar se suhagin gayi thi. Dadiji ko aaj bhi laal rang ki chundi aur mehndi chadhai jati hai.

‘’RUPA DADIJI SATI NAHI MAHASHAKTI HAI. DEVI SWARUPA HAI. SAMAJ KI MAHANAYIKA AUR GORAV HAI. DADIJI KA DHYAN AUR SMARAN MAHASHKTI DEVI KE ROOP MEIN KIYA JANA CHAHIYE NA KI SATI KE ROOP MEIN’’.

Meine jitna apne bade bujurgon se suna aur samjha tha utna likha hai. Mein apni jani anjani galtiyon ke liye Mamtamayi Dadiji se aur aap sab samaj ke bhai bahno se dil se maafi chahta hu.

Hindi typing meri laptop mein uplabdh nahi thi issliye English mein type kiya hai, janta hu bahut saari mistakes hogi kripa karke thik karke padh lijiyega. Ashuvidha ke liye khed hai par kya karu aaj raat se hi mann mein ek lagan lagi huyi thi ki Dadiji ke bare mein samaj ke yuva bhai bahno ko jankaari deni hai bade bujurg toh sab jante hai par nayi generation ko Dadiji ke mahan balidan aur tyag ka pata hi nahi ki hamare apne samaj mein bhi ek aisi mahan vibhuti huyi hai.

Kripya Dadiji ke bare mein jyada se jyada logo ko batayen khaaskar apne bacho ko taki nayi pidhi mein jagrukta ho aur unhe bhi pata chale ki humara NAGLANYA BOHRA sadharan nahi hai hamare samaj mein Rupa Dadiji jaisi Veerangna Devi ka janm hua tha.

Jai Rupa Dadiji ki !

Aapka apna,

Rajendra Bohra

S/O late Shri Mangilal ji Bohra

Bhojlai Baas, Sujangarh

Migrated to Gopalpura

Presently at Salem (Tamilnadu)

Mobile no. 08220018712

E-MAIL: rajendra.pareek30@gmail.com